Quero aplicar a miña ciencia á lingua para pintar a face do noso maior ben colectivo: o galego







venres, 6 de agosto de 2010

Fraga: “Son galego, son un chiste”

Unha das miñas teimas é a visualización e denuncia do auto-odio. Vai aquí un anaco.
por Cris Moss, no Xornal de Galicia:

O ex presidente da Xunta de Galicia e senador do PP, Manuel Fraga, non perde o sorriso. Malia que moitas das anécdotas que circulan pola rede refírense a algún dos seus moitos enfados, a hemeroteca de internet terá que engadir agora a súa aparición estelar no programa de televisión El club del chiste VIP.
O veterano político aceptou o convite para participar no devandito programa e contar un chiste. E contouno. “Isto era unha sueca nunha praia do norte á que advertiron que non podía levar un bañador de dúas pezas, ao que a rapaza respondeu inmediatamente: Cal delas quere que me quite?”, contou Fraga.
Non é un dos mellores chistes, pero a presentadora e modelo que acompañaba o senador popular, Martina Klein, non dubidou en agradecer a colaboración dun Manuel Fraga que tivo que ser subtitulado e que presumiu do elevado “sentido do humor dos galegos” tras as preguntas da condutora do programa.
Ademais, o ex presidente da Xunta recoñeceu tamén que tiña escoitado moitos chistes sobre a súa figura, aínda que advertiu que “algúns lle facían graza e outros non”. Animado a contar un sobre galegos, Manuel Fraga tirou da retranca: “Eu son galego e eu mesmo son un chiste”.

Ningún comentario:

Publicar un comentario