Quero aplicar a miña ciencia á lingua para pintar a face do noso maior ben colectivo: o galego







sábado, 28 de abril de 2018

Por unha Xunta menos eficaz

por Manuel Rivas en Luzes:

Temos os erros equivocados. Estamos a queixarnos continuamente dunha Xunta ineficaz, dun Goberno de inútiles, dun Partido Popular de poder absoluto e absoluta incompetencia.
Mais cómpre revisar o diagnóstico. Cambiar a táctica, a estratexia, a praxe e a teoría, o discurso e tamén a megafonía.
O caso é que cómpre revisar todo o xeito opositor dende o primeiro: cuestionar a visión da realidade. E a verdadeira realidade é que a Xunta está a ser extraordinariamente eficaz.
Hai cousas sinxelas, como unha faísca na escuridade, que provocan unha revolución óptica. E no meu caso a muxica foi a seguinte noticia: nun instituto de ensino medio d’A Coruña, de 700 estudantes, só cinco recoñecen utilizar habitualmente a lingua galega.
Non se debe a un rexeitamento xenético por parte da mocidade. Todas as enquisas din que aumentou a simpatía cara a lingua, aínda que desceu o uso. Nin a un ambiente especial na Coruña, malia a falsa lenda de cidade «señorita».
É un rechamante síntoma do que está a pasar en toda Galicia coa transmisión da lingua: non só o desleixo institucional, senón a programación consciente, sumamente eficaz, da desconexión do pobo e da lingua. Esa era a finalidade do Decreto lingüicida de 2010, que acabou coa condición vehicular do idioma galego, afastouno dos centros de educación infantil en todas as vilas (só nun 5% tense por lingua inicial) e está a converter a lingua nacida en Galicia hai un milenio, a lingua universal dos Cancioneiros Medievais, a lingua literaria dos reis Afonso O Sabio e D. Diniz, nun refugallo de morriña subalterna.
O Decreto de 2010 tivo o efecto dunha fumigación contaminante: matou os lexemas na atmosfera como o veleno químico acabou cos vagalumes.
O Decreto, e demais complementos destrutivos, foi un arma de guerra lingüística. E o segue a ser. En pouco tempo, nos últimos anos, deuse unha caída en vinte puntos do galego como lingua inicial. De bilingüismo, nada: de non recuperarse a condición vehicular do galego no ensino, vaise cara un monolingüismo en castelán.
Esa política programada de extinción do galego non só afecta á lingua, tamén couta os recursos de porvir do noso país, e está a estragar xa numerosos postos de traballo. Claro que a cultura real, para esta xente liberal-funcionaria, é traballo de nómades dos monicreques ou trasnos excéntricos que se alimentan de madreselva.
Por iso temos que cambiar a nosa ollada.
Este Goberno, a facción reaccionaria que ocupa a Xunta, é sumamente eficaz.
Pavimentou o camiño que leva ao exterminio do idioma galego.
E está a conseguilo.

Sem comentários:

Enviar um comentário