Un poema para o funesto decreto do plurilingüismo

O pasado 21 de marzo seica se celebraba o Día da Poesía. No meu centro tivemos a sorte de poder contar coa presenza do poeta Raúl Gómez Pato, acompañado do guitarrista Héctor Lorenzo ao que podemos ver moitas veces acompañando as voces de Uxía Senlle ou de Naja Shami.Todo un luxo. Para aqueles que non o puideron disfrutar, non hai palabras que poidan describir esa xornada.
De todo o que alí se recitou e de todo o que alí se cantou, eu quedeime cun pequeno poema que relata unha historia vivida nun autobús, camiño dunha excursión dun insituto. Os versos vanlle moi acaídos ao espíritu do funesto decreto para o plurilingüismo e a divulgación do cosmopaletismo que a el vai asociado. Velaquí o poema de Raúl Gómez Pato:

-¿E que che dixo?
-Díxome que bailaba moi ben e adiós.

Castelao

Foi na excursión de terceiro
Por fin na que,
Estreando uns Lee
Mirou para ela
A través das cervexas
Que lle alumeaban nas pálpebras.
Despoxouse entón da chepa
Da pesada timidez,
E xusto cando o bus
Fumegaba para partir
Espetoulle nos beizos
Unha pregunta sen resposta
Nun inglés incomprensible
Que nin el mesmo entendía
Pero que quedaba que nin dios:
Do you think I’m sexy, baby?