Quero aplicar a miña ciencia á lingua para pintar a face do noso maior ben colectivo: o galego







xoves 22 novembro 2012

A soidade do negacionismo

Desta volta que asina esta carta das Voces de ProLingua é a propia ProLingua. Trátase da resposta ao convite do  invitación Escola de Imaxe e Son de Vigo  para participar nun debate que terá como tema "o galego no ensino obrigatorio". Tan de acordo estou co seu contido que non podo facer outra cousa que felicitar á asociación de defensa da lingua pola súa claridade de ideas. Teño por certo que nela se trata sobre o maior erro cometido por outra organización de defensa da lingua, A Mesa, que é a de promocionar aos negacionistas sentándose a debatir con eles na mesma mesa.
Velaí a carta:

Estimadas alumnas e alumnos da Escola de Imaxe e Son de Vigo:Primeiro de nada queriamos desde ProLingua agradecervos o convite que nos remitistes para debater arredor da presenza do galego no ensino obrigatorio. Sobre todo porque pensastes en nós para participarmos e porque iso xa supón un recoñecemento implícito ao noso labor en defensa do idioma propio de Galicia, o que nos une a todas e a todos e o que nos fai galegas e galegos.Por desgraza, o debate, que adoita ser xermolo de ideas e de vitalidade intelectual, foi de a poucos desaparecendo do noso panorama audiovisual, substituído por híbridos espectaculares, nos que gaña a partida quen máis ergue a voz e nos que, máis que a exposición de ideas ou a argumentación, prima a descualificación do contrincante e a polarización de posturas. Sabemos que esa non é a vosa intención, e que esa desaparición efectiva do debate no medio televisivo ten moito que ver coa loita polas audiencias e coa conversión dos platós en lameiras nas que se insulta e sobre todo nas que se berra.Ocorre que o feito de participar nese encontro que nos propoñedes unha asociación como Galicia Bilingüe, que publicamente declarou a súa fobia cara ao galego e cara á súa presenza normalizada na nosa sociedade, impídenos compartir convosco un foro que podería, de seguro, resultar frutífero e estimulante. A asociación Galicia Bilingüe, que agrupa unha minoría fóbica pero moi rebuldeira, nega as principais leis e textos normativos que rexen a nosa convivencia, deosta a lingua que nós defendemos día a día e insulta a intelixencia das persoas, falando de sociedades bilingües (as sociedades non son bilingües, si os individuos) ou apelando á mentira da imposición do galego sobre o castelán. Vós mesmos, que estudades e seguramente vivides en Vigo, teredes, de seguro, moi clara cal é a presenza da lingua galega na vida pública, e comprobaredes que iso non dá nin para un debate surrealista.Os debates prodúcense arredor de argumentos e non arredor de dogmas e mentiras, e Galicia Bilingüe é só unha factoría de falsidades que dota de argumentos contra o galego a xente que non tivo tempo para pensar que o único que sente polo idioma de Galicia é odio e desprezo. O feito de ProLingua participar nun debate, ou peor aínda un cara a cara, con Galicia Bilingüe abaixaría a nosa condición á deles. Quen intoxica e nega a realidade do galego non pode, ao noso ver, debater sobre ela. Da mesma maneira que un grupo que defendera a inferioridade da muller nunca podería participar nun debate sobre violencia de xénero ou que un colectivo fundamentalista, que negara a dignidade de gais e lesbianas, non debería ser convidado a falar sobre o matrimonio homosexual.Desde ProLingua queremos só reiterar o agradecemento pola vosa invitación. Pola nosa parte preferimos que o parlamento dese representante de Galicia Bilingüe sexa máis ben un monólogo, unha parolada alleada e solipsista, na que eles mesmos argumenten o que queiran e eles mesmos se dean a razón, sexa ou non sexa verdade, que iso non lles ha importar.Unha aperta

Ningún comentario:

Publicar un comentario