Outros contra o decreto: o departamento de galego da Universidade de Vigo

Na Uniersidade de Vigo a saúde do galego é peor que a que acabamos de ver na de Santiago:
Uvigo: ‘Moitos universitarios chegan cun galego deficiente'
O Departamento de Filoloxía Galega e Latina dan a seguinte resposta ao decreto:

O Departamento de Filoloxía Galega e Latina da Universidade de Vigo, reunido en Consello
extraordinario o día 27 de xaneiro de 2010, ante a publicación das “Bases para o decreto de
plurilingüísmo” da Consellería de Educación da Xunta de Galicia quere manifestar:
1. O seu apoio ó documento redactado pola Real Academia Galega no que se poñen de
manifesto, argumentadamente, as eivas das mencionadas bases e se pide unha volta ó
consenso lingüístico manifestado no Parlamento coa aprobación do Plano de Normalización
Lingüística en 2004.
2. O galego segue sendo unha lingua desfavorecida en moitos ámbitos da sociedade.
Concretamente, no ensino universitario, a utilización da nosa lingua como vehicular é moi
limitada, malia que as universidades a recoñezan nos estatutos como lingua propia. Pouco se
ten avanzado neste sentido nos últimos 25 anos.
3. Estas “Bases” pretenden selo dun futuro decreto que condicionará o ensino durante os
próximos anos e que substituirá outro, o aprobado en 2007, que aínda non foi avaliado nos
seus resultados prácticos.
4. Como docentes universitarios, vemos con moita alarma calquera medida que limite aínda
máis a competencia lingüística que o alumnado ten cando chega ó ensino superior. Notamos
que un número significativo de estudantes chegan ás aulas universitarias cun dominio
deficiente das competencias básicas en lingua galega. Isto é debido, evidentemente, ó feito de
viviren nun mundo que se expresa maioritariamente en castelán (medios de comunicación,
ocio) pero tamén ó feito de que o ensino primario e secundario non deu situado o galego ó
mesmo nivel có castelán. As “Bases” non están deseñadas para corrixir estes problemas e
tememos que o único que farán será agravalos. Se o alumnado accede ó nivel universitario con
carencias nas linguas oficiais, galego e castelán, terá problemas no desenvolvemento das súas
carreiras, maiores sobre todo naquelas que non están centradas no estudo de contidos
lingüísticos e literarios.
5. A nosa responsabilidade como docentes do último período de educación dos estudantes
(graos e mestrados) fainos pedirles ós responsables das “Bases”, algún deles profesores
universitarios, que enxerguen a ameaza que supón este proxecto para a calidade do ensino
universitario. O ensino secundario non debe ser entendido como un compartimento estanco,
sen proxección na educación superior.
5. A Universidade baséase no diálogo e no contraste de ideas. Solicitamos que o Decreto que
regule o ensino das linguas oficiais, entre as que está a propia de Galicia, obxecto dunha
discriminación histórica, sexa consensuado entre as forzas políticas e que se teña en conta a
opinión do profesorado das distintas etapas educativas, tomando como referencia a da RAG,
máxima autoridade lingüística do país.
Este documento foi aprobado por unanimidade na sesión do Consello.
Vigo, 27 de xaneiro de 2010