Roble, Mordisco, Desfiladero, Cuevas del Rey, Carretera; novos concellos galegos

Se non o vise cos meus propios ollos, podería chegar a pensar que foi invento dalgunha mente realmente atravesada e se non o lera varias veces chegaría á conclusión de que realmente nunca se publicara tal monstruosidade. O certo e que si, que o vin, que un diario madrileño que recibe suculentas subvencións pola súa contribución á normalización lingüística elaborou unha monstruosidade que indica como anda por aquí iso da normalización, cousa que non é de estrañar por estar dirixida por mentes realmente atravesada.
Debido á morea de queixas que lle chegou, no diario xa modificaron a noticia na que informaban dun concurso de novas licenzas de FM  e na que aparecían presuntos topónimos de concellos galegos: *La Coruña, *Roble, *Órdenes, *Mordisco, *Desfiladero, *Cuevas del Rey, *Vivero e  *Carretera. Para mexar e non botar gota. Se hai alguén con curiosidade enfermiza pode consultar o texto orixinal no tumblelog As miñas historias.
O presunto concello da *Carretera non me custou moito saber a que vila facía referencia, pois vivo nela; aínda que postos a facer a cousas mal, facelas completamente mal: eu aconsellaríalle que para a próxima puxeran *La Carretera. Iso si, o caso de *Mordisco, teño que confesalo, non fun quen de desenlealo, e non me quedou máis remedio que recurrir á nota orixinal da Secretaría Xeral de Medios. para saber de que municipio se trataba. Certamente, a mente humana é retorta como un fouciño.
E que di a todo isto a SXPL? Como sempre, cala.