A curiosa política da SXPL

A SXPL tamén saca as súas conclusións sobre os datos do IGE. Como sempre queren amosarnos como positivo o que é negativo.
Preguntámonos: cal é o problema? Supoñemos que o uso normal do galego. Cal é a tendencia? Pois os datos do IGE son ben claros, o galego perde falantes continuamente, sobre todo entre as novas xeneracións e nas cidades. Ata tal punto isto é certo que o uso do galego nas cidades é prácticamente residual e cómpre ser un heroe para desenvolver unha vida en galego en calquera das cidades galegas, e cada vez máis. A actitude consistente en tapar ou disimular o problema indica claramente que non o quer resolver.
Deixámovos aquí parte da valoración da SXPL a respecto dos datos do IGE:

Santiago de Compostela, 16 de abril de 2010.- O galego é a lingua de maior uso social en Galicia, segundo se desprende dos datos que vén de facer públicos o Instituto Galego de Estatística (IGE) a través da Enquisa de condicións de vida das familias. Coñecemento e uso do galego. Segundo este estudo, o 56,4% da poboación maior de 5 anos fala sempre en galego ou máis galego ca castelán. Os que falan sempre en galego constitúen o 30% da poboación.

Xunto con este maior uso social do galego, os datos do IGE constatan un incremento da tendencia ao uso das dúas linguas oficiais de Galicia nos diferentes contextos sociais.

Máis sobre a SXPL. O secretario xeral de Política Lingüística, Anxo Lorenzo, animou onte os máis novos a seguir lendo en lingua galega durante a entrega dos premios Frei Martín Sarmiento, que tivo lugar no recinto feiral de Silleda no marco da Festa da Lingua. A Festa da Lingua, unha iniciativa que impulsa a Federación de Relixiosos do Ensino en Galicia (Ferega-Ceca), reuniu na presente edición preto de 1.000 alumnos e alumnas de primaria de diversos centros de ensino pertencentes a esta federación. Ata aquí todo parece ir ben.
Hai uns poucos anos o noso centro, o Pintor Colmeiro de Silleda, solicitara a colaboración do recinto feiral de Silleda para celebrar unhas xornadas de orientación. A resposta foi que poñían á nosa disposición as instacións requeridas... se pagábamos 4000 €. Fixeron a festa da lingua. Ben. Houbo 1000 asistentes. Ben. É de supoñer que a SXPL pagara os gastos. Ata aquí todo parece ir ben.
Pero lembremos que onte mesmo anunciabamos que a SXPL négalle axudas ao Correlingua, cunha participación prevista nas vindeiras semanas duns 40.000 alumnos.