O verdadeiro lema do 17 de maio

Pois polo que vexo, se queredes saber cal é o verdadeiro lema da manifestación convocada por Queremos Galego para o 17 de maio, ides ter que enterarvos neste blogue.
Aqueles despistados que por esas leis non escritas da fatalidade acabedes caendo nestas liñas e teñades a forza de espíritu de poñervos a ler esta mensaxe saberedes o que o resto dos amantes do galego continuarán ignorando. Estes últimos irán á manifestación pensando que o fan baixo un lema cando o certo é que o verdadeiro lema é outro.
Non sei o interese que poidades ter pola lóxica, concretamente polos seus símbolos. Os que son polo menos tan vellos coma min e cursaran no seu día o bacharelato, seguro que lembran, aínda que só sexa confusamente, aquelas divertidas leccións de lóxica de proposicións da materia de filosofía. O que xa non é tan seguro é que teñan coñecemento da lóxica de enunciados. A clave está neste último tipo de lóxica.
Na lóxica de enunciados xógase cos cuantificadores universais, un deles é o cuantificador da existencia e que se escribe como vedes aquí, como un E invertido. A notación débeselle a Giuseppe Peano, de principios do século XX, un matemático moi curioso que escribía os seus tratados nunha interlingua da súa invención que chamaba latino sine flexione. Non podo imaxinar nada máis poético: unha lingua sen literatura e chea de tratados de lóxica matemátca.
O asunto é que este símbolo, o cuantificador existencial, non nos interesa. O que si ten importancia para o noso existir é o chamado cuantificador universal, que é aquel que se le "todo"ou "para todo". Deste xeito, con esta clase de símbolos poderíamos establecer enunciados tales como "para todo x, tal que x é un libro, existe un y, tal que y é o seu autor", o que traducido significaría que todo libro ten o seu autor.
Eu non sei quen inventou este símbolo, como vedes é un A invertido, e as wikipedias din que vén do "All" inglés. Para min que se equivocan, e tendo en conta que entre os alemáns estaban entre os lóxicos e matemáticos máis destacados dos primeiros anos do XX, ben podía ser que o símbolo viñese do alemán "Allgemeinheit".
En todo caso, o lema está claro: "O galego, todo o noso existir"