Ter ao escritor David Otero como presentador é unha garantía. Efectivamente, o escritor estradense fixo unha aproximación ao presidente da Mesa que poderíamos cualificar de distinta e literaria, presentouno como só el o sabe facer, mediante unha crítica sistemática á política lingüística do goberno da Xunta, usando xogos de palabras, e facendo uso do seu coñecemento da figura de Carlos Callón, quen tampouco defraudou na presentación do seu libro En castellano no hay problema.Callón falou do despilfarro que acomete Feijóo ao gastar polo menos 5 millóns de euros en reducir a presencia do galego no ensino. Entre outros despropósitos destacou o de que se van tirar ao lixo 190.000 libros de texto que non tiñan ningún problema por teren erros pedagóxicos ou estaren anticuados, vanse tirar por ser libros en galego, e obrigarán aos pais a compralos en castelán. Unha medida que non parece moi apropiada no medio dunha crise económica, tendo en conta que a vida útil dun libro de texto é de polo menos catro anos, e estes libros tiñan só dous. Dos milleiros de libros no lixo pasou Callón a falar das toneladas de libros que nadan mal, en referencia ao acto que a Consellería de Cultura celebrou o Día do Libro nas cidades galegas. "Tratábase de escribir versos de Rosalía nas prazas de varias cidades, formando letras cos libros no chan, mais Meteogalicia informara o día anterior que ía chover,... e choveu". No Día do Libro houbo que ver centos de libros galegos estragados pola auga.
Carlos Callón tocou moitos outros temas, por exemplo, lembrou a campaña que está a facer Queremos Galego a respecto da consulta trampeada da lingua materna en infantil, e animou a todos os presentes a continuar na defensa da lingua en asociacións como A Mesa.
Só un apuntamento máis: o lote de libros que había a vender quedou escaso. Varios dos asitentes quedaron sen el.
Ningún comentario:
Publicar un comentario