O Panteón abre para a AELG

Segundo informa A Nosa Terra, o Panteón de Galegos Ilustres, situado na Igrexa compostelá de San Domingos de Bonaval, reabrirá as súas portas ao público este mércores en virtude dun convenio asinado entre a consellaría de Cultura e o Arcebispado de Santiago que permitirá que sexa visitábel durante seis días á semana.
Lembremos que o xoves realizarase o acto cívico-reivindicativo promovido pola AELG, en lembranza do traslado dos restos mortais de Rosalía de Castro, que tivo lugar o 25 de maio de 1891.Con este acto, apoiado por máis de 200 asociacións, reivindicarase a apertura do Panteón, así como a súa devolución ao seu lexítimo propietario: o pobo galego.
Eu, Domingo Fontán, se podo volverei a visitar o que ata hai un mes foi o meu cadaleito. Xa nos veremos por alí. Lémbrovos que alí estiven acompañado de xentes tan ilustres como Rosalía de Castro, Alfredo Brañas, Francisco Asorey, Ramón Cabanillas,ou Alfonso Daniel Rodríguez Castelao.