Lingua de ouro contra lingua de trapo

Segundo informa A Nosa Terra, Queremos Galego Marín entregará o vindeiro 25 de xuño a primeira edición dos premios 'Lingua de Ouro' e 'Lingua de Trapo' nunha cea na que participará o portavoz nacional da plataforma, Carlos Callón.

Na categoría individual, o “Lingua de Ouro” galardoará unha persoa que destaque na defensa do galego. A plataforma tamén lle outorgará un “Lingua de Ouro” á mellor iniciativa que axude a impulsar a presenza do idioma no comercio de Marín. A portavoz de Queremos Galego na vila, Sandra Pesqueira, explica que con estes premios “pretendemos recoñecer o intenso labor das persoas que contribúen a normalizar a nosa lingua acotío”.
Pola contra, Queremos Galego Marín concederalle o “Lingua de Trapo” a quen despreza e non respecta o idioma. “Con esta distinción faremos visíbel as persoas ou organismos que prexudican e silencian a lingua”, apunta Pesqueira.