O asasinato do galego

por Antón Losada, na revista Luzes:

Dise con frecuencia que a lingua galega está morrendo. Non podo estar máis en desacordo. Á lingua galega estana matando. Non morre coma se fora vítima dun accidente, dunha enfermidade ou das inexorables leis da evolución que obrigan a adaptarse ou morrer. Trátase dun crime premeditado, planificado e executado por criminais perfectamente conscientes, que saben o que fan e o que queren e actúan con premeditación e aleivosía; nin sequera se lles pode aplicar a atenuante de ignorancia porque saben perfectamente o que están asasinando e o que significa.

É que nunca cansa?

Sesudo artigo de Antón Losada, en Galicia Hoxe
Disque o castellanazo d’O Noso Alberto ficou máis ben en gatillazo. Nin inglés para todos, porque sae caro, nin consulta aos pais, porque non ten apoio legal. Pero non quedáramos en que era un dereito civil garantido pola Constitución e ameazado pola forzas da imposición? Ou é que cando o prometeu en campaña aínda non tiña acabada a carreira de Dereito? Pero non sufran. Como hai xente que nunca cansa de perder o tempo, agora ameaza con seguir enredando cunha lei. E, mentres, a educación dos nosos fillos e a lingua dos nosos avós, sometidas a máis presión e a máis indiferenza da que calquera debera soportar.

O idioma de todos

por Antón Losada, en Galicia Hoxe
Disque O Noso Alberto acaba de ofrecer un pacto lingüístico baseado na cooficialidade, a non discriminación e o carácter do galego como lingua propia de Galicia. Se falara en serio, o seguinte paso debera de ser a inmediata retirada do decreto da cordialidade mal entendida. Ademais de aforrarlle uns cantos desgustos e algún que outro ridículo, o simple xesto de arquivar para sempre unha norma que xa está derrogada pola realidade, deixaríao en posición de poder facer o seu traballo e de intentar empezar a ser o presidente de todos os galegos, falen no que falen. Pero, para iso, hai que estar ao que hai que estar, non perdendo o tempo en discusións inútiles.